Abdul Rahman Khan Wasfi Bahraichi
dil un ki mohabbat ka jo divana lage hai
ye aisi haqiqat hai jo afsana lage hai
aalam na koi puchhe miri vahshat-e-dil ka
ghar apne agar jaun to virana lage hai
badhte nahin kyuun mere qadam aage ki janib
nazdik hi shayad dar-e-janana lage hai
vaise to kisi ne mujhe aisa nahin jaana
divana kaha tum ne to divana lage hai
rudad-e-alam un se jo qasid ne bayan ki
farmane lage hans ke ye afsana lage hai
main ne to banai thi faqat aap ki tasvir
dil mera magar aaj sanam-khana lage hai
ab apna bhi begana nazar aata hai ‘vasfi’
begana to begana hai begana lage hai
Leave a Reply