Hamid Kahan Ki Daud Ke Jaun Khabar Ko Main

hamid kahan ki daud ke jaun khabar ko main

kis aarzu pe qata karun is safar ko main

maana buri khabar hai pa teri khabar to hai

sabr-o-qarar nazr karun nama-bar ko main

ye sang-o-khisht aah dilate hain teri yaad

rota huun dekh dekh ke divar-o-dar ko main

hai teri shakl ya tiri avaz ka khayal

karta huun iltifat yakayak jidhar ko main

afsos haae haae ki aati nahin sada

puchhe to kya bataun tire chara-gar ko main

kya ho gaya ise ki tujhe dekhti nahin

ji chahta hai aag laga duun nazar ko main

achchha jo tu ne gosha-e-marqad kiya pasand

ab apne haq men gor banaunga ghar ko main

tere sar-e-aziz ki balish ho khaak se

balin-e-gham se ab na uthaunga sar ko main

dekhi na thi bahar abhi tere shabab ki

bhula na tha abhi tire ahd-e-sighar ko main

taqdir hi ne haae na ki kuchh musaidat

kya rouun ab dua-o-dava ke asar ko main

hukm-e-khuda yahi tha ki baitha kiya karun

matam men tere ashk-fishan chashm-e-tar ko main

juz dard-o-dagh tu ne na chhoda nishan haif

rakhunga mehman inhen umr bhar ko main

kar ne do ah-o-nala ki akhir rahunga baith

taslim kar ke hukm-e-qaza-o-qadar ko main

kya fikr-e-ab-o-nan ki gham kah raha hai ab

maujud huun ziyafat-e-dil aur jigar ko main

tujh ko javar-e-rahmat-e-haq men jagah mile

manga karunga ab ye dua har sehr ko men

habs-e-davam to nahin duniya ki mar rahun

kaahe ko ghar khayal karun rahguzar ko main

khud ham se bhi zyada ho jo ham pe mehrban

vo jam-e-zahr de to na chakhun shakar ko main

vo jaane aur us ki raza jo pasand ho

sab kaam saunpta huun usi dad-gar ko main

hota na dil men dard to karta na haae haae

deta na tuul yuun sukhan-e-mukhtasar ko main

Leave a Comment