Jalal Lakhnavi
sad-shukr bujh ga.i tiri talvar ki havas
qatil yahi thi tere gunahgar ki havas
murde ko bhi mazar men lene na degi chain
ta-hashr tere saya-e-divar ki havas
sau baar aa.e ghash arini hi kahunga main
muusa nahin ki phir ho na didar ki havas
rizvan kahan ye ḳhuld o iram aur main kahan
aa.e the le ke kucha-e-dildar ki havas
sayyad jab qafas se nikala tha bahr-e-zab.h
puchhi to hoti murgh-e-giraftar ki havas
yusuf ko teri chaah ke saude ki aarzu
iisa ko tere ishq ke azar ki havas
dast-e-hava-e-gul men gareban hai mira
daman junun men khinchti hai ḳhaar ki havas
jab ho kisi ka rishta-e-ulfat gale ka tauq
divana-pan hai sub.ha-o-zunnar ki havas
maan.e hai zabt charḳh phunke kyunkar ai ‘jalal’
kis tarah nikle ah-e-sharar-bar ki havas
Leave a Reply