ashiq jo is gali ka bhi mar kar chala gaya
duniya se ek aur qalandar chala gaya
ghurbat ka apne haal tujhe aur kya kahun
ik din to ik faqir bhi uTh kar chala gaya
fir.aun apne daur ka zinda hai aaj bhi
duniya samajh rahi thi sitamgar chala gaya
chaqu pe hai nishan kisi be-gunah ka
qatil to haath men liye ḳhanjar chala gaya
vo tinka joḌ kar ke nasheman jo tha bana
basti ki aag men vo mira ghar chala gaya
ummid kar chuka tha na.e saal se bahut
ik aur zaḳhm de ke december chala gaya
laila se jo mila tha vo patthar liye hue
‘janbaz’ apne shahr se bahar chala gaya
Leave a Reply