gumrahi men na.e rabte mil ga.e
raah bhaTke hue qafile mil ga.e
meri tanha-ravi ka bharam miT gaya
ham-safar raston men na.e mil ga.e
jaane vaale isi moḌ par ek din
phir milenge agar raste mil ga.e
main tire aur nazdik aa ja.unga
qurbaton men agar fasle mil ga.e
teri tasvir album se gum thi magar
ḳhat ka.i tere likhe hue mil ga.e
jaane kya baat thi aaj pardes men
ajnabi ajnabi se gale mil ga.e
aaj phir raat ki aankh nam ho ga.i
phir se ham ḳhvab ko jagte mil ga.e
Leave a Reply