Azm Shakri
ghar men chandi ke koi sone ke dar rakh ja.ega
vo mire chashme men jab apni nazar rakh ja.ega
qaid kar le ja.ega nindon ki saari ka.enat
haan magar palkon pe kuchh sachche guhar rakh ja.ega
saare dukh so ja.enge lekin ik aisa gham bhi hai
jo mire bistar pe sadiyon ka safar rakh ja.ega
jagmagate jagte rishton ke sar kaT ja.enge
jab koi ehsas ke pinjre men Dar rakh ja.ega
teri fankari ka duniya ḳhud karegi e’tiraf
sang-rezon par tu jab shishe ke ghar rakh ja.ega
Leave a Reply