phir vahi badhte hue rukte hue qadmon ki chaap
phir vahi sahmi hui simti hui sargoshiyan
phir vahi bahki hui mahki hui si ahaten
phir vahi gaati si lahrati si kuchh madhoshiyan
zindagi tufan thi sailab thi bhaunchal thi
vaqt phir bhi karvaton par karvaten leta raha
qafile is raah par aate rahe jaate rahe
rahbar sab ko masafat ka sila deta raha
vo tabassum jis ko rote hain kai ujde suhag
ban raha hai ik lachakta khaar apne paanv men
vo nazar jo kal talak har jism ko dasti rahi
aaj sustane lagi hai maslahat ki chhanv men
kitni ummidon ke madfan us ke hathon ban chuke
kitne armanon ke lashe us ne khud kafnae hain
aah ye maqtal ki jis ke pasbani ke liye!
kitne mustaqbil fana ke dosh par lahrae hain
kulfaton se tang aa kar be-khudi ki khoj men
qafile is raah par aate rahen jaate rahen
rahbar sab ko masafat ka sila deta rahe
rah-rau apne tajassus ka sila paate rahen