Zafar Kaleem
ghar se nikale paanv to raste simaT ga.e
ham yuun chale ki raah ke patthar bhi hiT ga.e
ham ne khule kivaḌ pe dastak suni magar
vo kaun log the ki jo aa kar palaT ga.e
dar band hi rakho ki havaon ka zor hai
ab ke khule kivaḌ to samho ki piT ga.e
gharat-gari-e-zor-e-talatum are ghazab
kashti ke badban havaon se phaT ga.e
sahra ki tez dhuup ghane jangalon ki chhanv
in men mire nasib ke din raat baT ga.e
shohrat ki aarzu ne kiya be-vatan hamen
itni baḌhi gharaz ki usulon se haT ga.e
jab jab bhi main nai tark-e-vatan ka kiya ḳhayal
qadmon se mere gaanv ke raste lipaT ga.e
kin se karen shikayat-e-jaur-o-sitam ‘zafar’
apne gale to apne hi ḳhanjar se kaT ga.e
Leave a Reply