Shahid Kabir
har aa.ine men badan apna be-libas hua
main apne zaḳhm dikha kar bahut udaas hua
jo rang bhar do usi rang men nazar aa.e
ye zindagi na hui kanch ka gilas hua
main kohsar pe bahta hua vo jharna huun
jo aaj tak na kisi ke labon ki pyaas hua
qarib ham hi na jab ho sake to kya hasil
makan donon ka har-chand paas paas hua
kuchh is ada se mila aaj mujh se vo ‘shahid’
ki mujh ko ḳhud pe kisi aur ka qayas hua
Leave a Reply