Abdul Wahab Sukhan
mahak raha hai tasavvur men khvab ki surat
khila khila sa vo chehra gulab ki surat
saval us se ajab meri khamushi ne kiya
hansi labon pe thi us ke javab ki surat
kitab-e-dil ka miri ek baab ho tum bhi
tumhen bhi padhta huun main ik nisab ki surat
pukara jab bhi mujhe tum ne dasht-e-imkan se
koi umiid si ubhri sarab ki surat
ye us ke qurb ki padash men ‘sukhan’ ham ko
nasib hijr hua hai azaab ki surat
Leave a Reply