tire qarib rahun ya ki main safar men rahun
ye aarzu hai tire halqa-e-asar men rahun
shafaq shafaq mujhe dekhe nigah-e-husn-e-shu.ur
naqib-e-mehr banun naghma-e-sahar men rahun
yaqin ki chhanv men tujh ko jo niind aa jaa.e
main tere ḳhvab ki surat tiri nazar men rahun
jamal-e-shahid-e-ma.ani pe jab nikhar aa.e
ḳhayal-e-husn banun aur sher-e-tar men rahun
ye chahta huun ki maiḳhane tak rasa.i ho
agar sifal banun dast-e-kuza-gar men rahun
kabhi phirun main bayaban-e-dil men sargardan
kabhi nigar-e-kam-amez ki nazar men rahun
bana.en ahl-e-nazar surma-e-nazar mujh ko
ghubar ban ke agar teri rahguzar men rahun
tira jamal-e-dil-ara rahe tasavvur men
gulon ki bazm ki main chand ke nagar men rahun
dua-e-nim-shabi vo kare miri ḳhatir
kuchh aisa ban ke dil-e-husn-e-ishva-gar men rahun
mire nasib men ho tere naam ki surḳhi
ki jis ka tujh se ta.alluq ho us ḳhabar men rahun
kisi ki bazm men jaane se fa.eda kya hai
mire liye yahi behtar hai apne ghar men rahun
banun main tere liye vajah-e-lutf-e-lafani
ziya-e-ishq ki surat dil-o-jigar men rahun
tiri hi samt hamesha ho mera qibla-e-dil
hamesha mahv tire husn-e-mo’atabar men rahun
‘zafar’ ye mere liye to azab-e-jan hoga
ḳhuda na-karda ki main shahr-e-be-hunar men rahun
Leave a Reply