ye aur baat ki taḳhir se alag karunga
magar tujhe tiri tasvir se alag karunga
musafirat se jo fursat hui nasib to phir
thakan ko paanv ki zanjir se alag karunga
jo mere da.imi ehsas se juḌa hai sabaq
main kis tarah use tahrir se alag karunga
kunvare ḳhvab hue ja rahe hain avara
unhen main lazzat-e-ta.abir se alag karunga
utarna hai mujhe ab ana ko maut ke ghaaT
so us ko lahja-e-shamshir se alag karunga
mire badan men lagi hai jo hijr ki dimak
main us ko vasl ki tadbir se alag karunga
rivayaton se rakhunga main ‘faiz’ rishta magar
suḳhan zara sa taqi-‘mir’ se alag karunga
Leave a Reply