Daur Afridi
gham-e-dil ko badal jaane ki zid hai
magar ḳhushiyon ko Tal jaane ki zid hai
bigaḌti ja rahi hai meri duniya
magar mujh ko sambhal jaane ki zid hai
har ik tufan ko pichhe chhoḌ aa.uun
havadis se nikal jaane ki zid hai
miri fitrat badal jaa.e to kaise
tiri baton ko khul jaane ki zid hai
tire zaanu pe mera sar hai lekin
muqaddar ko machal jaane ki zid hai
mire jazbat ko taskin dena
samundar ko ubal jaane ki zid hai
ḳhilaf-e-zor-e-fitrat ‘daur’ behtar
magar fikron ko pal jaane ki zid hai
Leave a Reply