Poet
yaad ke tyauhar men vasl-o-vafa sab chahiye
raat ke resham men lipTi aap ki chhab chahiye
phir halavat se chhalakte jaam ḳhali ho ga.e
phir ghazal ko aap ki shirini-e-lab chahiye
raat ki vaadi men saari raunaqen abad hain
din ke virane men bhi ik gulshan-e-shab chahiye
soch aur alfaz ki bechainiyon men kuchh bhi ho
baat ki tah se nikalta saaf matlab chahiye
raushni ki jabr ne ankhon ko ḳhira kar diya
ab basarat ke liye kuchh zulmat-e-shab chahiye
rasm ki yaksaniyat niyyat ka parda ban ga.i
jo munafiq ka na ho aisa bhi maz.hab chahiye
apne gham ki uljhanen suljhaoge kab tak ‘munir’
dard alam-gir ho jaa.e yahi ab chahiye
Leave a Reply