shabnam-shakeel

Qafas Ko Le Ke Udna Pad Raha Hai

qafas ko le ke udna pad raha hai

ye sauda mujh ko mahnga pad raha hai

miri har ik masafat raegan thi

mujhe taslim karna pad raha hai

suna hai ek jaadu hai mohabbat

ye jaadu hai to ulta pad raha hai

mohabbat hai hamen ik dusre se

ye aapas men batana pad raha hai

jo rahna chahta hai la-taalluq

taalluq us se rakhna pad raha hai

samajhti thi bahut asan jin ko

unhin kamon men rakhna pad raha hai

hui jaati hai phir kyuun duur manzil

mira paanv to sidha pad raha hai

main kin logon se milna chahti thi

ye kin logon se milna pad raha hai

main ab tak mar nahin paai huun ‘shabnam’

so ab tak mujh ko jiina pad raha hai

More Poems

Leave a Comment