is but ke har fareb pe qurban se rahe
ik umr apne miTne ke saman se rahe
us jan-navaz kuche men ham bhi rahe magar
be-dil kabhi rahe kabhi be-jan se rahe
rindan-e-mai-kada hain ki tang aa ke uTh ga.e
yaran-e-mai-kada hain ki anjan se rahe
us men chaman ka rang na is men chaman ka ruup
ham bu-e-gul se aaj pareshan se rahe
lab si liye jo ḳhanda-e-yaran ke ḳhauf se
barson hamare siine men tufan se rahe
ye jaan aisi chiiz hai kya phir bhi ham-nashin
ham un pe jaan de ke pasheman se rahe
gulshan men josh-e-gul to bagula hain dasht men
ahl-e-junun jahan bhi rahe aan se rahe
Leave a Reply