ahmad-ali-barqi-azmi

Bimar-e-Mohabbat Ki Dawa Aur Hi Kuchh Hai

bimar-e-mohabbat ki dava aur hi kuchh hai

kuchh aur hi samjhe the hua aur hi kuchh hai

‘azad’ ki tahrir ka andaz alag hai

‘iqbal’ ke naghmon ki nava aur hi kuchh hai

is ahd men har-samt hai ik alam-e-mahshar

hai dil men jo ik hashr bapa aur hi kuchh hai

be-sud qafas men hai har asaish-e-duniya

parvaz ko azad faza aur hi kuchh hai

jazbat men ikhlas se badh kar nahin kuchh bhi

be-laus mohabbat ka maza aur hi kuchh hai

fan-pare men hai pas-e-rivayat bhi zaruri

tahrir ka uslub naya aur hi kuchh hai

hai karb ka ehsas jo jiine nahin deta

na-karda gunahi ki saza aur hi kuchh hai

zahid ki riya-kar ibadat se hai afzal

allah ke bandon ka bhala aur hi kuchh hai

sirat men hai jo husn vo surat men nahin hai

pakizgi-o-sharm-o-haya aur hi kuchh hai

be-maut bhi marne pe vo kar deta hai majbur

nazron men hai jo tez qaza aur hi kuchh hai

mahdud hai shahon ki gadaon pe navazish

bandon pe ye inam-e-khuda aur hi kuchh hai

yuun to hain mashahir-e-sukhan shohra-e-afaq

‘barqi’ ki alag tarz-e-ada aur hi kuchh hai

More Poems

Leave a Comment