fasil-e-dil men dar kiya ki rabta bana rahe
ise ḳhuda ka ghar kiya ki rabta bana rahe
zamin pe apne jism ki thakan bichha ke so gaya
bharosa ḳhaak par kiya ki rabta bana rahe
sabhi gharon men aap hi muqim tha isi liye
mujhe bhi dar-ba-dar kiya ki rabta bana rahe
vo dushmanon ki saf men tha isi liye kalam bhi
kaman khinch kar kiya ki rabta bana rahe
use pasand aa ga.iin palak palak pe jhalaren
so main ne in ko tar kiya ki rabta bana rahe
main ḳhud-gharaz men matlabi tabhi ḳhuda se pyaar bhi
kisi ke naam par kiya ki rabta bana rahe
ye kuza-gar ka shauq tha tabhi to meri ḳhaak ne
tha raqs chaak par kiya ki rabta bana rahe
kabhi main karbala gaya kabhi madina o najaf
kahan kahan safar kiya ki rabta bana rahe
Leave a Reply