Meer Hasan
ham na tanha us gali se jaan ko kho kar uth gae
saikdon yaan zindagi se haath dho kar uth gae
dekhne paae na ham ashkon ka apne kuchh samar
tukhm goya yaas ke ye the jo bo kar uth gae
kal tire bin baagh main kuchh dil na apna jo laga
ashk-e-khunin men gulon ko ham dubo kar uth gae
lotte hain is ada-o-naz par aur ghash men ham
the vo ahmaq jo ki teri kha ke thokar uth gae
jan-o-dil ham ik jagah baithe the kuche men tire
pasban ke haath se avara ho kar uth gae
tu gaya tha dhundhne un ko kahan ve to ‘hasan’
tere ghar men aae baithe lete so kar uth gae
Leave a Reply