Usha Bhadoriya
ik ta.alluq sa kisi naam se jab hota hai
be-sabab bhi koi jiine ka sabab hota hai
barha socha magar tum ko bata bhi na saki
gham ka ehsas miri ruuh ko kab hota hai
DhunDhta rahta hai aksar mire andar tujh ko
meri tanha.i ka aalam bhi ajab hota hai
yuun ba-zahir sabhi anjan nazar aate hain
jante sab hain ki is shahr men sab hota hai
uTh gaya jaise zamane se mohabbat ka chalan
kaun ab kis ke liye ḳhanda-ba-lab hota hai
lafz bhi khol nahin paate kabhi lab apne
dusra naam mohabbat ka adab hota hai
apne aghaz se chalti huun main anjam ki samt
meri sub.hon ka safar janib-e-shab hota hai
kisi tinke ka sahara nahin milta mujh ko
Duub jaana miri taqdir men jab hota hai
chand be-nam se rishte hain labon par ‘usha’
koi duniya men kisi ka bhala kab hota hai
Leave a Reply