Mahendra Partap Chand
ik lafz-e-mohabbat ke bane laakh fasane
tohmat ke bahane kabhi shohrat ke bahane
kis ko ye ḳhabar thi ki bikhar ja.enge pal men
ankhon ne saja rakkhe the jo ḳhvab suhane
ik zaḳhm-e-juda.i hai ki nasur bana hai
karta huun tujhe yaad isi gham ke bahane
aqdar ka fuqdan havasnaki-o-vahshat
sab parde haTa rakkhe hain ab sharm-o-haya ne
furqat ki shab-e-karb ke jaate hue lamho
kab lauT ke aaoge mujhe phir se rulane
bhane lagi jab dil ko zara bazm ki raunaq
tanha.i miri aa ga.i phir mujh ko manane
vo gul huun jo Thahraya gaya tang-e-baharan
pamal kiya ḳhud hi jise bad-e-saba ne
shakir huun main har haal men razi-ba-raza huun
taskin ki daulat mujhe baḳhshi hai ḳhuda ne
azar-e-gham-e-dil ko na hona tha shifayab
kuchh kaam kiya ‘chand’ dava ne na dua ne
Leave a Reply