Nushur Wahidi
haqiqat jis jagah hoti hai tabani batati hai
koi parde men hota hai to chilman jagmagati hai
vo aa.e bhi nahin aur zindagi ki raat jaati hai
sahar hoti hai aur sham-e-tamanna jhilmilati hai
sitaron ka sahara le ke dharti baiTh jaati hai
falak ko dekh kar jis dam gharibi muskurati hai
main daman thamta huun aur ada daman chhuḌati hai
mohabbat hai to kuchh be-gangi bhi paa.i jaati hai
miri nakami-e-gham zauq-e-hairani banati hai
ye duniya duur se meri nazar men jagmagati hai
sukut-e-vasl ka lamha bhi kya bedar-ḳhvabi hai
mohabbat jagti hai aur javani soi jaati hai
vo jab sanjida hote hain ada angḌa.i leti hai
vo jab ḳhamosh hote hain javani gungunati hai
zamana hai ki dil-giri men afsurda sa rahta hai
tabi.at hai ki ghamgini men jaulani pe aati hai
hava-e-daman-e-nikhat-faza ka vasta tum ko
zara Thahro charagh-e-zist ki lau thartharati hai
musalsal gulshan-e-hasti men kanTe us ne bo.e hain
ye duniya phir inhin kanTon se kyuun daman bachati hai
na gham fursat hi deta hai na aansu band hote hain
barasta ja raha hai menh badli banti jaati hai
yahi hasti ‘nushur’ ik roz hai anjam-e-hasti bhi
yahi duniya kisi manzil pe uqba ho ke aati hai
Leave a Reply