Mahtab Haider Naqvi
dil to ik shaḳhs ko naḳhchir banane men gaya
saz-e-dil naghma-e-dil-gir banane men gaya
raat ik ḳhvab jo dekha to hua ye malum
din bhi us ḳhvab ki tasvir banane men gaya
partav-e-ḳhana-e-mauhum ghanimat tha magar
vo bhi ik naqsha-e-tamir banane men gaya
ruuh to ruuh hai kuchh bas nahin is par lekin
ye badan ḳhaak ko iksir banane men gaya
yaar to dirham o dinar banane men ga.e
aur main ishq ki jagir banane men gaya
sher tasir se ḳhali hua vaqt-e-tabir
nafs-e-mazmun bhi taqrir banane men gaya
Leave a Reply