Faiz Ahmad Faiz
(1)
main jahan par bhi gaya arz-e-vatan
teri tazlil ke daghon ki jalan dil men liye
teri hurmat ke charaghon ki lagan dil men liye
teri ulfat tiri yadon ki kasak saath gai
tere naranj shagufon ki mahak saath gai
saare an-dekhe rafiqon ka jilau saath raha
kitne hathon se ham-aghosh mira haath raha
duur pardes ki be-mehr guzargahon men
ajnabi shahr ki benam-o-nishan rahon men
jis zamin par bhi khila mere lahu ka parcham
lahlahata hai vahan arz-e-filistin ka alam
tere aada ne kiya ek filistin barbad
mere zakhmon ne kiye kitne filistin abad
Leave a Reply