chhodenge gareban ka na ik taar kabhi ham
baithenge junun men to na bekar kabhi ham
rahte na ijazat ke talabgar kabhi ham
hote jo tire talib-e-didar kabhi ham
pahnaega ham ko vo gul-e-zakhm ki baddhi
pahnaenge qatil ko jo ik haar kabhi ham
divana-navazi hai ki sar ko diye patthar
chhodenge na ab daman-e-kohsar kabhi ham
vallah buton se nahin karne ke mohabbat
rakkhenge na ab rishta-e-zunnar kabhi ham
anqa ho jahan se miri jaan nam-e-huma bhi
paaen jo tira saya-e-divar kabhi ham
phahe to rahe daagh junun par pa-e-jannat
kya dar hai jo rakhte nahin dastar kabhi ham
tajviz kiya kijiyega yuun hain sazaen
ya rahm ke bhi honge saza-var kabhi ham
fursat nahin milti hai ghazal kahne ki ai mehr
padhte hain tab is dhang ke ashar kabhi ham