Rashid Taraz
ye umr guzri hai itne sitam uThane men
ki ḳhauf aata hai agla qadam uThane men
zamin ka mujh se havala bhi TuuT paaya nahin
main sarfaraz raha tera gham uThane men
har ek shai pe hai yaksaniyat ka ghalba kyuun
ye imtiyaz-e-vajud-o-adam uThane men
chamak ke kucha-e-qatil men neze kya karte
ki josh-e-ḳhun tha hamare qalam uThane men
tumhari yaad bhi aa.i to kis tarah aa.i
hayat ruk si ga.i chashm-e-nam uThane men
shikast kha na saka mera lafz-e-haq ‘rashid’
main be-ḳhatar raha us ka alam uThane men
Leave a Reply