zindagi daav pe har aan lagi rahti hai
dil ki baazi men sada jaan lagi rahti hai
hain tire ma.arka-ara ki tamasha.i hain
bhiiḌ kaisi sar-e-maidan lagi rahti hai
koi bilqis nazar aa.e na aa.e phir bhi
khoj men ruh-e-sulaiman lagi rahti hai
ḳhalq ummal se nalan hai magar yaron ko
fikr-e-ḳhush-nudi-e-sultan lagi rahti hai
baḳht-sazan-e-re.aya men kashish hai kitni
har nazar janib-e-aivan lagi rahti hai
kyon badalta nahin tu is ko tavana.i men
aag to ai dil-e-hairan lagi rahti hai
aadmi shauq se farigh nahin rahta ‘gulzar’
dhun koi ziist ke dauran lagi rahti hai
Leave a Reply