nigah-e-saqi-e-na-mehrban ye kya jaane
ki tuut jaate hain khud dil ke saath paimane
mili jab un se nazar bas raha tha ek jahan
hati nigah to charon taraf the virane
hayat laghzish-e-paiham ka naam hai saaqi
labon se jaam laga bhi sakun khuda jaane
tabassumon ne nikhara hai kuchh to saaqi ke
kuchh ahl-e-gham ke sanvare hue hain mai-khane
ye aag aur nahin dil ki aag hai nadan
charagh ho ki na ho jal-bujhenge parvane
fareb-e-saqi-e-mahfil na puchhiye ‘majruh’
sharab ek hai badle hue hain paimane
Leave a Reply