Apni Ham-Zad Ke Liye

ye mire ru-ba-ru kaun hai?

jism o jaan chithde karne vaali miri jaan

tu miri kaun hai???

teri aahen miri teri chiḳhen miri

tere zaḳhmon ki aahat mire jism par

dard sah ke mujhe zindagi dene vaali miri jaan

tu miri kaun hai?

jabr tujh ko mile ḳhauf us kokh men

hijr tu ne piye zahr us soch men

resman bandh kar pankhudi dene vaali miri jaan

tu miri kaun hai???

tu sahar ki vo banki ada jis ko din kha gaya

vo mire dil ki ujdi dua jis ko dil Dha gaya

raat din sard lamhon ke tezab men galne vaali miri jaan

tu miri kaun hai??

tu pighalti rahi

aag is dil men jalti rahi

harf Dhalte rahe shaam hathon ko milti rahi

raqs kar ke mujhe aable dene vaali miri jaan

tu miri kaun hai???

Leave a Comment