Kahiye Gar Rabt Muddai Se Hai

kahiye gar rabt muddai se hai

kahte hain dosti tujhi se hai

dekhiye aage aage kya kuchh ho

dil ki harkat ye kuchh abhi se hai

us ki ulfat men jite-ji marna

faeda ye bhi zindagi se hai

zid hai gar hai to ho sabhi ke saath

ya na milne ki zid mujhi se hai

ḳhauf se tum se kah nahin sakte

dil men ik aarzu kabhi se hai

mujh se puchho ho kis se ulfat hai

tum samajhte nahin kisi se hai

ranjish-e-ghair se nahin matlab

kaam ham ko tiri ḳhushi se hai

is qadar aap ham pe zulm karen

is ka insaf aap hi se hai

rashk dushman na sah sakega ‘nizam’

ye bhi na-char apne ji se hai

Leave a Comment