jise aana hai milne ke liye vo aa hi jaata hai
na aana ho to vaadon se faqat bahla hi jaata hai
jo aa kar khvab men bhi zehn-o-dil par chha hi jaata hai
vo zulf-e-mushkbu se qasr-e-dil mahka hi jaata hai
kabhi vahshat-zada mahaul men apne hi saae se
hujum-e-kashmakash men aadmi ghabra hi jaata hai”
har ik chehre pe aae jab nazar ik dusra chehra
fareb-e-rang-o-bu insan aksar kha hi jaata hai
jise apna samajhta tha parayon se bhi hai bad-tar
miri auqat aa kar vo mujhe batla hi jaata hai
parae aur apne dafn kar ke laut aate hain
jo tanha aaya hai duniya se vo tanha hi jaata hai
jalane aur bujhane men maharat hai jise hasil
ulajh jaati hai jo gutthi use suljha hi jaata hai
junun-e-intiha-e-shauq khizr-e-rah ho jis ka
vo apni manzil-e-maqsud ‘barqi’ pa hi jaata hai
Leave a Reply