Faza Ibn E Faizi
aur kya mujh se koi sahib-nazar le ja.ega
apne chehre par miri gard-e-safar le ja.ega
dastaras asan nahin kuchh ḳhirman-e-ma.ani talak
jo bhi aa.ega vo lafzon ke guhar le ja.ega
chhanv men naḳhl-e-junun ki aao Thahra len use
kaun jalti dhuup ko sahra se ghar le ja.ega
asman ki khoj men ham se zamin bhi kho ga.i
kitni pasti men mazaq-e-bal-o-par le ja.ega
main hi tanha huun yahan us ki salabat ka gavah
kaun uTha kar ye mira sang-e-hunar le ja.ega
kaaT kar dast-e-dua ko mere ḳhush ho le magar
tu kahan aḳhir ye shaḳh-e-be-samar le ja.ega
past rakkho apni avazon ko varna duur tak
baat ghar ki raḳhna-e-divar-o-dar le ja.ega
main uThata huun qadam halat ki rau ke ḳhilaf
janta huun vaqt ka jhonka kidhar le ja.ega
itni lambi bhi nahin logo ye gumnami ki umr
DhunDh kar mujh ko shu.ur-e-mo.atabar le ja.ega
karobar-e-zindagi tak hain ye hangame ‘faza’
kya vo saaya chhoḌ dega jo shajar le ja.ega
Leave a Reply