daagh hone lage zahir mere
tez kar rang musavvir mere
meri ankhon men siyahi bhar de
ya hare kar de manazir mere
nuqra.i jhiil bulati thi unhen
phans ga.e jaal men taa.ir mere
kaun tahlil hua hai mujh men
muntashir kyuun hain anasir mere
hai kahan shankh bajane vaala
kab se ḳhamosh hain mandir mere
sang se jism bhi kar ab mujh ko
tu kahan khoya hai sahir mere
lafz ki qaid-o-riha.i ka hunar
kaam aa hi gaya aḳhir mere
Leave a Reply