vo mere qalb-o-ruh ko shadab kar gaya
phir is tarah gaya mujhe betab kar gaya
kajal bhi niind ka miri ankhon se le uda
khvabon men aa ke vo mujhe be-khvab kar gaya
us ne to iztirab ke maani sujha diye
aisi nigah ki mujhe betab kar gaya
jins-e-giran samajh ke nahin dekhta koi
mujh ko vo ek jauhar-e-nayab kar gaya
jauf-e-sadaf samajh ke padi abr ki nazar
thi sath-e-ab par vo tah-e-ab kar gaya
baaqi rahe na bam-o-dariche na hi fasil
kya haal mere dil ka ye sailab kar gaya
sahir tha devta tha koi but-tarash tha
patthar thi ek ‘bano’ vo simab kar gaya
Leave a Reply