Hasan Abbas Raza
visal-ghaḌiyon men reza reza bikhar rahe hain
ye kaisi rut hai ye kin azabon ke silsile hain
mire ḳhuda izn ho ki mohr-e-sukut toḌen
mire ḳhuda ab tire tamasha.i thak chuke hain
na jaane kitni gulab-sub.hen ḳhiraj de kar
rasan rasan ghor amavason men ghire hue hain
sada.en dene lagi thiin hijrat ki apsara.en
magar mire paanv dharti-man ne pakaḌ liye hain
yaqin kar lo ki ab na pichhe qadam haTega
ye aḳhiri had thi aur ham is tak aa ga.e hain
Leave a Reply