main kis se puchhta ki bhala kya kami hui
tha shor jis gali men vahan ḳhamushi hui
ik main hi to nahin huun pareshan-o-pur-malal
ai shaam tere saath bhi ab ke baḌi hui
mahfuz kar na pa.enge divar-o-bam-o-dar
meri fughan hui ki vo teri hansi hui
divar-e-jan gira ke hi niklegi yad-e-yar
ek meḳh jaise dil ke hai andar gaḌhi hui
khulti hi ja rahi hai giranbari-e-junun
zanjir kya hai paanv se mere bandhi hui
ab dekhiye to kya ye vahi chashm hai ‘na.im’
zambil thi ki ḳhvabon se koi bhari hui
Leave a Reply