Rafique Khayal
raqs-e-nairangi hai nazzaron ke biich
ji raha huun sho.abada-karon ke biich
ek duniya ko hai luT jaane ka Dar
ek ham hain luT ga.e yaron ke biich
shikva-e-jaur-o-jafa kis se karun
pyaar se mahrum huun pyaron ke biich
mulk-o-millat qaum-o-maz.hab dosto
kya nahin bikta ḳharidaron ke biich
azmat-e-havva ka ik aur aa.ina
ho gaya nilam bazaron ke biich
asl rishta to zamin se hai mira
yaad aaya mujh ko sayyaron ke biich
shauq-e-ḳhud-ara.i ke hathon hua
ik hayula qaid divaron ke biich
ya-ilahi rahm karna aaj vo
aa ga.e chal ke talab-garon ke biich
mere dam se hi hui hai raushni
dasht-o-sahra aur kohsaron ke biich
ai bahar-e-abr-e-nau jaldi baras
jal rahe hain ḳhvab angaron ke biich
mujh men hai maujud parvaz-e-‘ḳhayal’
mo’atabar huun main bhi fankaron ke biich
Leave a Reply