Shah Naseer
udhar abr le chashm-e-nam ko chala
idhar saqiya! main bhi yam ko chala
mubarak ho ka.aba tumhen shaiḳh-ji!
ye banda to bait-us-sanam ko chala
sar-e-rah-guzar aah ai be-nishan
kidhar chhoḌ naqsh-e-qadam ko chala
javahar ka TukḌa hai ye laḳht-e-dil
tu ai ashk le is raqam ko chala
tira ma.il-e-husn ai sarv-qad
suna hai ki mulk-e-adam ko chala
hubab-e-lab-e-ju ki manind aah
ḳhabar jald le koi dam ko chala
tire ishq men saath apne ‘nasir’
liye hasrat-o-dard-o-gham ko chala
Leave a Reply