shikva-e-gham ka asar yaad aaya
husn-e-mahjub-e-nazar yaad aaya
ashk-e-ḳhunab-asar yaad aaya
laḳht-e-dil laḳht-e-jigar yaad aaya
paanv ka hosh na sar yaad aaya
tera kucha tira dar yaad aaya
hamdam-e-rah safar yaad aaya
saya-e-barg-e-shajar yaad aaya
jab bhi dekhi hai badalti duniya
un ka andaz-e-nazar yaad aaya
hichkiyan phir lagin aane ruk kar
phir koi bar-e-digar yaad aaya
qasr-e-shahi men sukun kya milta
apna ujḌa hua ghar yaad aaya
ham ne khaa.i thi jahan par Thokar
phir vahi rahguzar yaad aaya
ruḳh ki saugand hai zulfon ki qasam
tu mujhe sham-o-sahar yaad aaya
haram-o-dair ka chakkar chhoḌa
ham ko jab aap ka dar yaad aaya
kyon ‘mubarak’ na ho manzil asan
ham-safar vaqt-e-safar yaad aaya
Leave a Reply