ye nahin hai ki mujhe teri nazar yaad nahin
us ne kya mujh se kaha tha ye magar yaad nahin
be-niyazi ye nahin gum-shudagi hai ai dost
ki mujhe rabt-e-qadim-e-dar-o-sar yaad nahin
vahi shor-e-arini aur vahi bebaki-e-shauq
ki mohabbat ko agar aur magar yaad nahin
dil-e-ḳhud-kam hai asuda-e-aish-e-manzil
use dil-sozi-e-yaran-e-safar yaad nahin
haa.e ye gum-shudagi ruuh ki taqdir men thi
aaj puchho ki kahan ghar hai to ghar yaad nahin
didani hai ye sarasimgi-e-dida-e-shauq
ki tire dar pe khaḌe hain tira dar yaad nahin
zindagi kya hai faqat ek junun-e-raftar
ki safar men hain magar vaj.h-e-safar yaad nahin
phir vahi shauq ki bebak-ḳhirami ‘rizvi’
saḳhtiyan raah ki ai mard-e-safar yaad nahin
Leave a Reply