Shah Naseer
haar bana in para-e-dil ka maang na gajra phulon ka
aur kahan se ashiq-e-muflis laae ye gahna phulon ka
dekhe hai vo sehn-e-chaman men ja ke tamasha phulon ka
daghon se ban jaae ye siina kaash ki takhta phulon ka
kaash dil-e-sad-chak ye ban kar bechne vaala phulon ka
ku-e-butan men ja ke pukare lo koi gajra phulon ka
harf nahin hai dida-e-tar tukdon se jigar ke laaeq par
sail-e-ashk ko dariya samjho us ko navada phulon ka
subh nahin be-vajh jalae laale ne gulshan men charagh
dekh rukh-e-gulnar-e-sanam nikla hai vo laala phulon ka
mujh ko na le chal bad-e-bahari rang-e-chaman hai vahshat-khez
jeb se le kar daman tak sau tukde karta phulon ka
tu ne litaya angaron par subh talak ai vaada-khilaf
teri khatir ham ne kiya tha shab ko bichhauna phulon ka
silk-e-sarishk-e-surkh zamin tak tujh ko dikhave mizhgan se
phuljhadi aisi chhod koi huun main bhi lachha phulon ka
kaan se tere jhuk jhuk kar ye leta hai bose aariz ke
ya to hamare tukde kar ya tod ye baala phulon ka
dhuup men us ka haae qafas sayyad sitam ijad rakhe
rahta tha jis murgh-e-chaman ke sar par saaya phulon ka
jhal khaae aghyar na kyuun kar kul chilvan se haat nikal
maara tha us parda-nashin ne mujh ko pankha phulon ka
ishq men tere gul kha kar jaan apni di hai ‘nasir’ ne aah
us ke sar-e-marqad par gul-ru la koi duuna phulon ka
Leave a Reply