na.i barish ki rim-jhim men libas-e-gham to badlega
vahi rasm-e-chaman hogi magar mausam to badlega
vo qahr-e-shah-ḳhavar ho ki zahr-e-bad-e-sarsar ho
kisi surat mizaj-e-nazuk-e-shabnam to badlega
masihaon ne kuchh taaza dava.en la ke rakkhi hain
na.e zaḳhm a.enge ab bhi magar marham to badlega
kafan resham ke maqtulon ko ab pahna.e ja.enge
azadaron ka tarz-e-girya-o-matam to badlega
na.i saqi-gari ka jashn-e-fayyazi mubarak ho
vahi honge ayagh-o-jam lekin sam to badlega
na.i navak-zani hogi magar itna bhi kiya kam hai
ki jis aalam men ham rahte hain vo aalam to badlega
Leave a Reply