Poet
manzil pe le ke pahunchega azm-e-javan mujhe
kah do na saath le ke chale karvan mujhe
sunta huun phir chaman men hui khema-zan bahar
aae na kyuun qafas men bhi yaad ashiyan mujhe
khoya hua huun un ke tasavvur men is tarah
jaise sunae un ki koi dastan mujhe
ye jab bhi aai laai naved-e-bahar bhi
phir kyuun bahar se na ho pyari khizan mujhe
main ho gaya huun kab se nasheman se be-niyaz
kah de koi darae na barq-e-tapan mujhe
ik vaqt tha chaman ke liye mar mite the ham
rahne usi chaman men na de baghban mujhe
Leave a Reply