Poet
pahlu men dil hai dard-e-mohabbat liye hue
baiTha huun ka.enat ki daulat liye hue
is husn-e-ishva-gar se farishte na bach sake
hai aadmi to phir bashariyyat liye hue
allah re ghubar guzargah-e-yar ka
hai zarra zarra tuur ki azmat liye hue
hogi qubul davar-e-mahshar ye pesh-kash
aaya huun main mata.a-e-nadamat liye hue
hon baryab-e-bazm vo saa.at kab aa.egi
muddat guzar chuki hai ijazat liye hue
halanki muskurate hain vo vaqt-e-guftugu
lahja magar hai saaf kudurat liye hue
mar kar bhi gul-ruḳhon se juda.i na ho saki
phulon ka Dher hai miri turbat liye hue
gumnam tha to kunj-e-qana.at nasib tha
phirti hai char-su miri shohrat liye hue
har gosha mere qalb ka maidan-e-hashr hai
hai muḳhtasar makan ye vus.at liye hue
naale nikal ke dil se agar arsh tak ga.e
ja.enge ai falak ye tiri chhat liye hue
ik hur-vash ke kuche ka ‘sabir’ hai dil pe naqsh
baiTha huun main kanar men jannat liye hue
Leave a Reply