Duniya Pe Mere Fan Ka Asar Baad Mein Hua

duniyā pe mere fan kā asar baad meñ huā

pahle to aib thā ye hunar baad meñ huā

barsoñ sarāb ban ke mirī aañkh meñ rahā

ik shaḳhs vo jo dīda-e-tar baad meñ huā

sohbat meñ merī thā to kushāda thī us kī fikr

vo tang-zehn tang-nazar baad meñ huā

ik sher raat zehn ke kāġhaz pe niiñd meñ

hone se rah gayā thā magar baad meñ huā

kūche se us ne mujh ko nikālā to shor kyuuñ

aadam bhī to bahisht-badar baad meñ huā

kahte haiñ log us kī to fitrat thī dhuup kī

vo shaḳhs chaltā phirtā shajar baad meñ huā

ham ḳhānqāh-e-ishq ke pahle murīd haiñ

majnūñ kā to idhar se guzar baad meñ huā

‘dilbar’ ne baar baar ujāḌā hai luuT kar

ābād apne dil kā nagar baad meñ huā

Leave a Comment