gae baras ki iid ka din kya achchha tha
chand ko dekh ke us ka chehra dekha tha
faza men ‘keats’ ke lahje ki narmahat thi
mausam apne rang men ‘faiz’ ka misra tha
dua ke be-avaz uluhi lamhon men
vo lamha bhi kitna dilkash lamha tha
haath utha kar jab aankhon hi aankhon men
us ne mujh ko apne rab se manga tha
phir mere chehre ko hathon men le kar
kitne pyaar se mera matha chuma thaa!
hava! kuchh aaj ki shab ka bhi ahval suna
kya vo apni chhat par aaj akela thaa?
ya koi mere jaisi saath thi aur us ne
chand ko dekh ke us ka chehra dekha thaa?
Leave a Reply