aag laga di pahle gulon ne baagh men vo shadabi ki
aai khizan gulzar men jab gul-barg se gulkhan-tabi ki
kunj-e-lahad men mujh ko sula ke puchhte hain vo logon se
niind unhen ab aa gai kyun-kar kya hui jo bad-khvabi ki
soch men hain kuchh paas nahin kis tarah adam tak pahunchenge
aa ke safar darpesh hua hai fikr hai be-asbabi ki
abr hai giryan kis ke liye malbus siyah hai kyuun is ka
sog-nashin kis ka hai falak kya vajh aba-e-abi ki
zer-e-mahal us shokh ke ja ke paanv jo ham ne phailae
sharm-o-haya ne uthne na di chilman jo chhuti mahtabi ki
dil ka thikana kya main bataun haal na is ka kuchh puchho
duur karo hoga vo kahin galiyon men aur sai har baabi ki
dil na hua pahle jo bismil lotne se kya matlab tha
dhuum thi jab khush-bashiyon ki ab shohrat hai betabi ki
shamon ka akhir haal ye pahuncha sabr pada parvanon ka
kavve utha ke le gae din ko paai saza sartabi ki
ghunche khajil hain zikr se us ke tang dahan hai aisa us ka
naam hua unaqa-e-zamana dhuum udi nayabi ki
bajre lagae logon ne la ke un ke baramad hone ko
ashkon ne mere rah-e-vafa men aaj to vo sailabi ki
khat nahin padta mere gale par tishna-e-hasrat marta huun
tegh tiri be-ab hui thiin arzuen khush-abi ki
rahm hai lazim tujh ko bhi gulchin dil na dukha tu bulbul ka
nikhat-e-gul ne us se kashish ki taab na thi betabi ki
nazaa men ya-rab khanda-jabin huun ruuh jo nikle khush nikle
pesh-e-nazar aaen jo farishte surat ho arabi ki
kalghi ki ja par taaj men rakh le zauq rahe pa-bosi ka
paae agar bilqis kahin tasvir tiri gurgabi ki
padh ke vazifa ishq ka us ke tum jo tadap ke rote ho
ruuh na ho tahlil ‘sharaf’ hasrat se kisi vahabi ki
Leave a Reply