Pritpal Singh Betab
ye zamin huun vo asman bhi huun
main yahan bhi huun main vahan bhi huun
martaba mera jo bhi hai so hai
bahut achchha huun main jahan bhi huun
mujh se bahar mira suragh nahin
main ki manzil bhi huun nishan bhi huun
tan-e-tanha bhi gamzan huun aur
saath sab ke ravan-davan bhi huun
mujh se mere siva na kuchh bhi maang
main safar bhi huun armughan bhi huun
zara aage nikal ke dekhun agar
main koi yad-e-raftagan bhi huun
zindagi ki huun be-nishani bhi
main kisi gor ka nishan bhi huun
faḳhr bhi hai ki phir bhi huun ‘betab’
apni hasti se bad-guman bhi huun
Leave a Reply