Mannan Bijnori
shab-e-be-mah bhi us ki nahin kaali hogi
jis ne katran bhi tire nuur ki pa li hogi
log kahte hain koi tujh sa hasin aur bhi hai
main ye kahta huun ki ye baat ḳhayali hogi
us ne bhi mujh ko yahi soch ke DhunDa na kabhi
main ne ab tak to na.i duniya basa li hogi
jab suna ek andhera sa hai ghar men mere
dukh se bole miri tasvir haTa li hogi
hain pasheman vo mo.attal tujhe kar ke ai dil
gham na kar phir usi mansab pe bahali hogi
aaTh das saal men ‘mannan’ ye ejaz-e-suḳhan
tum ne kuchh umr-e-suḳhan apni chhupa li ho hogi
Leave a Reply