ḳhvab ka ḳhvab haqiqat ki haqiqat samjhen
ye samajhna hai to phir pahle tariqat samjhen
main javaban bhi jinhen gaali nahin deta vo log
meri janib se ise ḳhaas mohabbat samjhen
main to mar kar bhi na bechunga kabhi yaar ka naam
aap tajir hain numa.ish ko ibadat samjhen
main kisi beach ke raste se nahin pahuncha yahan
hasidon se ye guzarish hai riyazat samjhen
mera be-saḳhta-pan un ke liye ḳhatra hai
saḳhta log mujhe kyuun na musibat samjhen
facebōk vaqt agar de to ye pyare bachche
apne ḳhamosh buzurgon ki shikayat samjhen
pesh karta huun main ḳhud apni giraftari ‘ali’
un se kahna ki mujhe zer-e-hirasat samjhen
Leave a Reply